星期六早餐 - M&S Oat with strawberry & almond, 黑松露醬炒蛋, 黑松露芝士 +Cracker

特別Enjoy整早餐同晚餐, 反而Lunch好似求其D或叫外賣都無所謂. 

今朝有M&S Oat with strawberry & almond, 維記高鈣低B奶, 黑松露醬炒蛋(唔洗問緊係偷偷地學人網購~), 
黑松露芝士+Cracker (黑松露芝士係CCSUPER約$4X 有100G, 值得一試). 一人一柸TWG茶.  

 Cracker我係誤打誤撞試的, 點知原來係超好味! 薄薄地好脆好香, 有一粒粒麥既口感, 配CHEESE一流! 

平日晚餐 - 煎蛋牛肉煲仔飯 清炒菜芯

今個月既工作生涯確係有些累, 已經好耐無平日煮飯. 上星期日晚趕回家煮飯

今次既煲仔飯終於岩岩好, 不喜窩蛋所以變煎蛋. 菜心以前我懶, 用李錦記的蒜蓉粒炒, 次次都覺得怪怪地食唔到小炒既味. 今次唔懶, 拍扁幾粒蒜頭炒, 得左~ 原來係咁!


Lilac Mist 18cm 開張~

平日晚餐 - 蘿蔔清湯腩, 三色椒豆豉椒排骨, 天山雪蓮果蟲草花豬骨湯

星期六晚靚靚stoneware開餐, 用CASSIS20整左一個下晝既蘿蔔清湯腩:



跟HAPPY EVERYDAY 整的, http://blog.yahoo.com/_IUW3BZ6R6WTMD7S2QOMGVCXRVU/articles/50816
因叫媽媽幫我去街市買, 唔記得叫佢揀坑腩, 所以用普通腩, 都夠林, 不過坑腩個賣相應該會PRO D! 食左一半, 唔想第二晚即食另一半, 所以隔油後擺入冰格等Weekday搵晚可食牛腩河~ 

星期日晚繼續用靚靚stoneware, 我以前唔食三色椒架! 好青! 不過食食下原來椒係有椒既甜味! 
生菜就真係一晚一半咁食左, 星期六晚炒, 星期日晚用雞湯煮. 另外白濛濛既係洋蔥炒薯條, 唔好味既wuwuwu

食個湯好好味! 係媽媽提供材料: 天山雪蓮果(好似薯仔果舊) 蟲草花(一條條) 豬骨 金腿 煲左兩個鐘. 
天山雪蓮果就咁食無乜特別味, 淡淡地, 但煲湯會令D湯好好味! 神奇~ 

平日晚餐 - 蒜容白菜, 菜舖炒旦, 薑絲炒牛肉, 新加坡版出前一丁, 蕃茄薯仔湯

依個新加坡版出前一丁(冬蔭味)好正架! 之前千色店曾經斷貨, 尋日一見到即買兩PACK. 我唔係特別好辣的人, 不過依個味真係好惹味好正!



蕃茄薯仔湯加洋蔥煲特別甜, by Cassis 20cm -> Cassis 20cm係我LC生涯一大錯失! 外國平好多呀!!! 要買, 買LILAC MIST呀!
_{即係呢... 後來我賣左STAUB 18CM (嫌細)... 去左... 換個LILAC MIST 18CM...} 不過依然覺得CASSIS係我一大敗筆!! 蠢 蠢 蠢! 所以要用多D! 



星期一返工, 無驚無險~ 返屋企煮飯, 呵呵~
我以前成日一餐好一餐壞... 質素參差不齊! 依幾晚居然晚晚都保持到水準! HAPPY!

簡單蒜容白菜, 菜舖炒旦, 值得HIGHLIGHT係媽媽秘方薑絲炒牛肉, 我係出邊未食過, 相信係佢自創!! 簡單醃好肉, 炒7成熟後加切幼的薑絲, 比少少水成汁就得, 好好味!!!! 除非唔鍾意食薑, 否則女士特別岩食!

牛肉我用通之廚房的方法醃, 好得好滑, 唯一係我唔加老抽, 糖同油, (for牛肉鹽都唔可以加) 都已經好得!

平日晚餐 - 雞扒三色意粉, 蘆筍底

繼續煮繼續煮~ 

蘆筍用雞粉焯熟去青味, 意粉用水煮(比建議時間少1-2分鐘), 倒水後落靚初炸OLIVE OIL(平時煮餸用普通OLIVE OIL, 煮意粉先用靚野~) BASIL, 蒜容炒, 落意粉兜1-2分鐘, SALT & PEPPER 調味. 

雞扒用返之前方法煎, 我係落水蒸時開始用第二邊爐兜意粉, 確保樣樣野都熱~

平日晚餐 - 雞扒菜飯, 淮蓮杞元芡粟米湯

今晚試菜飯, 我只係用返電飯煲因為驚菜出水, 自己控制唔到個水份. 先煲飯, 白菜(我唔LIKE小棠菜呀~) 同蒜容薑容先炒一炒, 見電飯煲仲有10分鐘熟就將菜撈入飯, 由得佢熟完再蒸10分鐘, 今次飯岩岩好~

雞扒用清然(話無味精), SALT, PEPPER醃20分鐘以上, 用陶瓷鑊煎(又唔敢用個20CM GRILL), 我煎既方法係煎香兩邊, 然後落少少水"咋"一聲, CUM蓋. 等D蒸汽蒸熟, 重複多一兩次, 試下最厚既地方如果熟, 就開蓋收水, 再煎香返有皮果面. 上碟後先SUM芝麻  (芝麻在CCSUPER買一日本包裝, 已焗香的) 



今日特別濕個人好累, 煲左依個健脾袪濕既湯, 跟以下食譜造的, 沒落螺片都已經好好飲. by Cassis 20cm

淮蓮杞元螺芡粟米湯

1- 豬蹍
2- 淮山(乾身)約 6片
3- 蓮子約12粒, 去芯
4- 芡實約12粒
5- 元肉約8粒
6- 螺片(乾身)約3片, 浸軟
7- 杞子約20多粒(或10克左右)8- 清水約1800毫升
9- 果皮約3片, 浸軟,去囊
10- 粟米約3條, 切半
1. 豬蹍和螺片飛水備用2. 將所有材料放入煲內, 蓋好蓋, 大火煲滾, 續續煲15分鐘, 轉慢火, 煲3個半小時, 加鹽調味即可

Sweet: 媽媽秘方- 煲湯會落少少平時切好既金華火腿, 大約一茶匙仔就夠, D湯會特別香同有老火FEEL.

放假下午茶 - 芝士火腿洋蔥Burger, 貓屎咖啡

星期三晚返港, 星期四五繼續放假到下星期先返工, 好爽!
係屋企無偷懶, 食個TEA都手作架! 有時間可以煮多D, 又可以整得好D.

參考係CX機上SERVE個SANDWICH, 其實以前做空姐時我地都好怕SERVE SANDWICH, D客見無飯食好多都黑面!!! Anyway, 整個住家版: 洋蔥用牛油炒香, 少少SALT & PEPPER, 再用同一個鑊烘兩塊火腿, 包既兩面, 然後夾時係洋蔥面加塊CHEESE, 用其他食材熱力逼到佢溶溶地, 非常簡單, 睇落卡路里都唔太高.

 買左好多不同形狀既簽仔終於有用~

另外配兩柸貓屎咖啡! 我好幸福, 住係印尼既舅父每次來香港都會帶比我同細妹~
貓屎咖啡我覺得未沖/煮之前香過之後(我用普通蒸餾咖啡機), 沖完出黎唔講唔知係咁正既咖啡, 飲落好純, 一D酸味都無, 但又未至於想像中好強烈既咖啡味.